50 AÑA HOYER I 25 AÑA KU ENERGIA SOLAR

Antilliaans, Aruba; 15/03/2009-

Radio Hoyer 2, e promé emisora di radio kompletamente na hulandes na Kòrsou, a kumpli eksaktamente 50 aña dia 10 di mart último. Sinku aña promé a funda Hoyer 1, e emisora mama. Ademas, e luna akí tambe ta hasi 25 aña ku Radio Hoyer a pasa pa energia solar komo promé emisora na mundu, ku su transmishonnan riba FM.

A selebrá e hubileo ku 'De Grote Gouden Radio Hoyer 2 Show' ku hopi músika dje delaster sinkuenta añanan i ku entrevista ku e oyente. N'e okashon ei gezaghèber Lisa Dindial a presentá notisia i a diskutí riba e importansha di periodismo independiente na Kòrsou.

E Solo di Pueblo (Hoyer 1) i Hèt Station onder de zon (Hoyer 2) a kuminsá ku aktividatnan musikal di fundadó Horacio Hoyer. Despues di Di Dos Guera Mundial el a bira popular komo tenista, ku su mes negoshi di artíkulo di deporte den Kerkstraat, awendia Hanchi Snoa. Asina ku ora di sera yega, e tabata pusha e panel parti patras un banda i...ata un studio di grabashon ta aparesé manera pa obra di magia, asina yu muhé i aktual doño dje emisora Helen Hoyer ta konta. E tabatin su mes marka di disko 78, esta Hoyco. Magnitut i diversidat dje kolekshon di disko di Radio Hoyer kétubai ta algo úniko.

Músika propio

Komo ku e tabata di opinion ku pueblo tin derechi riba un emisora di radio ku su mes músika i idioma papiamentu, a start ku Radio Hoyer dia 10 di mart di 1954. Esaki a tuma lugá n'e mes edifisio kaminda Radio Hoyer ta kétubai, n'e banda di Julianaplein ku a konvertí den Plasa Horacio Hoyer, despues di su morto na 1987.

Despues di sinku aña Hoyer a agregá un emisora kultural apart na hulandes, spesial pa arte i músika klásiko. Asina a inisiá Radio Hoyer 2 dia 10 di mart di 1959. E emisora no a resultá sufisientemente interesante riba nivel komersial i ta p'e motibu akí a kambia fòrmat di añanan setenta den un notisiero i alabes emisora di músika popular, kos ku a keda asina te dia djawe. Fuera djesei ta koperá ku Radio Nederland Wereldomroep komo emisora sosio. Es mas, algun empleado di sekshon karibense di e emisora internashonal a inisiá nan karera na Hoyer!

Radio Hoyer pues ta sinónimo di 55 aña di istoria radial. Helen Hoyer ta kòrda vários momento kulminante, manera e kobertura eksklusivo, bibu i direkto di e úniko kareda Grand Prix ku a yega di tene na Kòrsou na añanan ochenta. E kòntèstnan pa talento nobo tambe ta grabá den su memoria.

Energia solar

Otro kulminashon den istoria di Radio Hoyer tabata ten ku e kanalnan FM a suich pa energia solar, na mart di 1984. Promé ku esei Hoyer tabata transmití riba AM, pero pa FM mester a buska un otro lokalidat, asina tékniko Rob de Wolff ta konta. Tafelberg tabata e mió opshon, no solamente pa kubri henter Kòrsou, sino tambe Boneiru i un pida di Aruba.

Instalashon di koriente riba Tafelberg a bira muchu karo. Konsehero tékniko Fred Chumaceiro a introdusí su mes konsepto pa emisoranan FM ku ta funshoná riba 128 panela solar. Esaki a nifiká primisia mundial pa Hoyer, ku emisoranan ku ta drei kompletamente riba energia di solo. Rob de Wolff ta kere ku den tur e 25 añanan ei nunka e emisora no a yega di bai for di aire ku fayo di koriente.

Pionero

Na añanan '50 i '60 e emisora tabata un di e pokonan ku tabata pertenesé n'e pioneronan. Hopi lokutor a siña nan trabou serka Hoyer. Aktualmente tin komo trinta radioemisora na Kòrsou, asina ta ku Hoyer a para bira un di e tantu emisoranan. Rib'un merkado chikí, kaminda tur ta dependé di e mes patrosinadónan ta birando mas i mas difísil pa ofresé e mes kalidat, segun Helen Hoyer.

E ta rekonosé sí ku esaki ta komun den mundu di komèrsio. "Ma mi tabata gusta ten ku tabatin kuater emisora, pasó por a kompetí ku preis, ku programa. Tabata purba di ta un kompetidó di bèrdè mes ku programanan inventivo. N'e momento akí ta mas bien un kestion di sobrebibí.

"No opstante, Radio Hoyer ke destaká den e époka akí tambe ku mehorashon di su programanan. Informá, eduká i entretené pueblo tabata e 'pilánan ku mi tata a usa semper pa edifiká e emisora'. "Loke ku nos a mantené tambe, pero mester keda al dia sí", asina Helen Hoyer ta bisa. Asina ta ku informá, eduká i entretené ta e tres konstantenan den e 55 añanan di radio Hoyer.

(Radio Nederland Wereldomroep)